Më 20 shkurt, negociatat pozitë-opozitë për paqen në Siri

1 Shkurt 2017 - 09:13      

I dërguari i Posaçëm i OKB-së për Sirinë, Staffan de Mistura, ka thënë se negociatat për paqe mes qeverisë siriane dhe opozitës janë caktuar për 20 shkurt.

Pasi informoi Këshillin e Sigurimit të OKB-së, De Mistura u tha gazetarëve që negociatat në Gjenevë, të caktuara fillimisht për 8 shkurt, tashmë janë shtyrë që marrëveshja për armëpushim të fuqizohet dhe që qeverisë t’i jepet mundësia që të angazhohet seriozisht në veprime, derisa opozita të ketë kohë që të bashkohet rreth delegacionit të saj.

I dërguari i OKB-së ka thënë se armëpushimi që hyri në fuqi më 30 dhjetor, po respektohet në masë të madhe.

Ftesat për negociata do t’u dërgohen palëve rreth 8 shkurtit ka shtuar De Mistura, duke thënë se nëse opozita nuk bashkohet deri atëherë, ai do të zgjedhë delegacionin dhe do të sigurohet që të jetë sa më përfshirës. Ai shtoi se në delegacion do të ketë edhe gra, e që më herët nuk ishte ashtu.  

© KOHA