Kryeministri kanadez, sulmin në xhami e quan “sulm terrorist ndaj myslimanëve”

30 Janar 2017 - 17:37      

Gjashtë persona u vranë dhe tetë të tjerë mbetën të plagosur kur persona të armatosur shtien me armë zjarri ndaj një xhamie në qytetin e Kebekut gjatë lutjeve të së dielës mbrëma, ndërsa kryeministri kanadez, Justin Trudeau, e quajti këtë akt “sulm terrorist ndaj myslimanëve”.

Policia ka thënë se dy të dyshuar janë arrestuar, por nuk kanë dhënë detaje për ta apo se çfarë e ka nxitur sulmin, raporton Reuters.

Fillimisht, kreu i xhamisë tha se pesë persona mbetën të vrarë ndërsa një dëshmitar tha se së paku tre persona kanë shtënë ndaj rreth 40 personave që gjendeshin në Qendrën Kulturore Islamike të qytetit të Kebekut. Policia tha se vetëm dy persona kanë qenë të përfshirë në sulm, transmeton Koha.net.

Trudeau tha përmes një deklarate: “E dënojmë këtë sulm terrorist ndaj myslimanëve në një qendër të adhurimit dhe strehimit”.

“Kanadezët myslimanë janë pjesë e rëndësishme e ndërtimit tonë kombëtar, dhe këto veprime të pandjenja nuk kanë vend në komunitetet, qytetet dhe vendet tona”.

© KOHA