Spirale shqetësuese kriminaliteti dhe atentatesh në Mal të Zi

24 Janar 2017 - 09:20      

Podgoricë, 24 janar – Autoritetet malazeze janë të shqetësuara për një intensifikim të ndjeshëm të aktiviteteve kriminale me atentate, shkëmbim zjarresh dhe larje hesapesh mes bandave rivale në rrugët e kryeqytetit Podgoricë, njoftuan dje burime të ndryshme.

Ngjarja e fundit, sipas medias, lokale ndodhi pardje në mbrëmje kur, gjatë një shkëmbimi zjarri përpara lokalit “Buda Bar”, shumë i njohur në kryeqytetin malazez, mbeti i plagosur rëndë kikbokseri, Mirko Vlahoviq, një sportist shumë i njohur në vendin më numrin më të vogël të popullsisë në Ballkan.

I operuar me urgjencë, Vlahoviq, i cili punon në shërbimin e sigurisë së këtij lokali, është në gjendje të mirë shëndetësore.

Në vitin 2014, Vlahoviq mbeti sërish i plagosur gjatë një tjetër shkëmbimi zjarri në lokalin ”Cool”.

Gjatë muajit të fundit, në Podgoricë ka pasur tre atentate me shpërthime dhe kanë vdekur dy persona, çka ka çuar edhe në dorëheqjen e dy drejtuesve të policisë.