Referendumi për ndryshimet kushtetuese në Turqi, më 26 mars ose 16 prill

16 Janar 2017 - 13:10      

Kuvendi i Madh Popullor i Turqisë po planifikon kalendarin e referendumit për propozimin e ndryshimeve kushtetuese. Sinjalet nga Parlamenti dhe qeveria tregojnë se data më e hershme për referendumin do të jetë 26 marsi, kurse ajo më e vonshme 16 prilli...

Kuvendi i Madh Popullor i Turqisë po planifikon kalendarin e referendumit për propozimin e ndryshimeve kushtetuese.

Sinjalet nga Parlamenti dhe qeveria tregojnë se data më e hershme për referendumin popullor do të jetë 26 marsi, ndërsa ajo më e vonshme 16 prilli.

Në rast se paketa e ndryshimeve kushtetuese me gjithsej 18 pika miratohet në tërësi me të paktën 330 vota në Kuvend, e gjithë vëmendja do të kthehet nga referendumi popullor.

Partia për Drejtësi dhe Zhvillim (Partia AK) në pushtet synon që tërësia e paketës për ndryshime kushtetuese të marrë fuqi ligjore më datë 20 ose 21 janar.

Nëse çdo gjë shkon sipas parashikimit të qeverisë, ligji planifikohet që t’i paraqitet për dekretim Presidentit Recep Tayyip Erdogan më 23 ose 24 janar.

Data e saktë e referendumit do të përcaktohet në varësi të afatit ligjor 15-ditor, i cili njihet me kushtetutë Kreut të Shtetit të Turqisë për të dekretuar një ligj.

Sipas kushtetutës aktuale turke, referendumi popullor duhet të mbahet të dielën e parë pas ditës së 60-të nga publikimi i dekretit të Presidentit Erdogan në Fletoren Zyrtare.

Në bazë të këtij kalendari, data më e hershme e plebishitit do të jetë 26 marsi, ndërsa ajo më e vonshme 16 prilli.