Mbërrin në 52 numri i të vdekurve në Siberi nga helmimi me zëvendësues alkooli

20 Dhjetor 2016 - 09:35      

Autoritetet ruse thonë se së paku 52 njerëz në një komunitet siberian kanë vdekur ditëve të fundit, pasi kanë konsumuar losion për trup me përmbajtje të metanolit.

Komiteti Federal Hetues tha se dhjetëra banorë në qarkun Lenin të qytetit Irkutsk janë helmuar me losionin e quajtur Boyaryshnik, pavarësisht paralajmërimit në etiketë se nuk mund të konsumohet në organizëm.

Raportohet se edhe 29 persona tjerë janë të shtrirë në spital, disa prej të cilëve janë në gjendje të rëndë dhe mund të vdesin, transmeton Koha.net.

Zëdhënësi i Kremlinit, Dmitry Peskov, tha se helmimet janë “një tragjedi e tmerrshme që kërkon vëmendje”.

Helmimet me alkool zëvendësues janë të shpeshta në Rusi.

Njerëzit pinë nganjëherë substanca që përmbajnë alkool dhe janë më të lira se pijet alkoolike. 

© KOHA