MPB-ja e Maqedonisë numëron shkeljet që e përcollën procesin zgjedhor

11 Dhjetor 2016 - 21:40      

Në konferencën e dytë për sonte, Ministria e Punëve të Brendshme e Maqedonisë bëri të ditur se zgjedhjet kaluan në atmosferë të qetë e me incidente të vogla.

“Dita zgjedhore kaloi në atmosferë të qetë me incidente të vogla”, deklaro Jordan Llamanovski, ndihmës ministër për marrëdhënie me opinionin në MPB.

“Për dallim nga ciklet e mëparshme zgjedhore mund të thuhet se zgjedhjet kaluan qetë. Janë parashtruar disa kallëzime penale për incidente të vogla dhe janë thirrur në stacion policor disa persona për shkruarjen e grafiteve dhe dëmtimin e gjësendeve”, tha Llamanovski.

Ai tha se gjatë procesit zgjedhor policia ka intervenuar në shumë raste ndaj parashtresave të Komisionit Shtetëror Zgjedhor (KSHZ), qytetarët dhe komitetet zgjedhore më shumë për fotografimin e fletëvotimeve.

“Në disa raste deri tek MPB-ja kanë arritur edhe parashtresa për blerjen e votuesve dhe për transportimin e organizuar të votuesve në qendrat e votimit”, tha Llamanovski.