Bora shkaktoi probleme edhe në Greqi

30 Nëntor 2016 - 09:10      

Bora e parë e këtij sezoni, që po bie në Greqi që nga dita e djeshme, shkaktoi probleme të ndryshme në disa pjesë të vendit.

Në Greqinë veriore, për shkak të borës së shtresuar u mbyllën disa rrugë, ndërsa me probleme të mëdha në komunikacion po përballen edhe banorët e Selanikut, ku gjithashtu mbrëmë u mbyllën disa rrugë.

Borë dje ra në pothuajse të gjitha viset malore dhe gjysmëmalore në Greqinë veriore, qendrore dhe jugore, ndërsa këto ditë pritet që temperaturat të ulen edhe nën zero, kumtoi Shërbimi nacional meteorologjik, transmeton KP.

Sinoptikët grekë kumtuan se reshjet e borës do të vazhdojnë edhe sot, në të gjitha rajonet malore dhe kodrinore në Greqinë qendrore dhe jugore, si dhe në rajonet më të ulëta në pjesën veriore të vendit.

Në rajonet detare priten stuhi të fuqishme, kryesisht në orët e pasdites, ndërkaq moti gradualisht do të fillojë të përmirësohet nga perëndimi drejt veriut.

Për shkak të temperaturave të ulëta për sonte pritet në pjesën më të madhe të vendit të ketë edhe ngrica.