Serbi i arrestuar për tentim-sulmi terrorist në Mal të Zi, lirohet si dëshmitar i mbrojtur

23 Nëntor 2016 - 13:16      

Megjithëse pa një konfirmim zyrtar të organeve në Mal të Zi, shtetasi i Serbisë, Aleksandar Sinxheliq, ka dalë të martën nga burgu hetues në Spuzhë, pasi, më herët, me vendimin e Gjykatës së Lartë në Podgoricë, zyrtarisht u bë dëshmitar-bashkëpunëtor, njofton Radio Televizioni i Malit të Zi.

Sinxheliq nuk do të ngarkohet me veprën për “sulm terrorist” në ditën e zgjedhjeve. Prokuroria, siç njoftojnë mediat malazeze, bazuar në procedurat ligjore, i ka ofruar mbrojtje të cilën do ta zbatojnë pjesëtarët e Drejtorisë së Policisë, raporton REL.

Paraprakisht, statusin e dëshmitarit të penduar Sinxheliqit ia ofroi prokurori special shtetëror, Sasha Çagjenoviq, pasi vlerësoi se dëshmia e tij mund të ndihmojë në zbardhjen e rastit dhe se deklarata e tij është e një rëndësi më të madhe nga dëmet me të cilat ngarkohet.

Kjo ishte edhe arsyeja pse Gjykata e lartë në Podgoricë pranoi propozimin e Prokurorisë.

Për rastin e cilësuar si “sulm i planifikuar terrorist” në ditën e zgjedhjeve parlamentare në Mal të Zi, janë arrestuar disa dhjetëra persona, si në Mal të Zi, ashtu edhe në Serbi.