Të paktën tetë migrantë të vdekur dhe shumë të zhdukur në Mesdhe

23 Nëntor 2016 - 09:39      

Romë, 23 nëntor – Të paktën tetë migrantë u gjetën të vdekur gjatë operacioneve që kanë mundësuar shpëtimin e më shumë se 1 200 personave në brigjet e Libisë dhe shumë të tjerë kanë rezultuar të zhdukur, njoftuan sot rojat bregdetare italiane dhe një OJQ.

Një anije e rojave bregdetare italiane ka gjetur shtatë të vdekur në një gomone ndërkohë që OJQ-ja malteze “Moas” ka gjetur një të vdekur në një gomone tjetër, ku të mbijetuarit kanë njoftuar për shumë të zhdukur.

“Këto tragjedi të tjera kanë ndodhur pas një jave të zezë shënuar nga një bilanc prej 18 të vdekurish dhe 340 të zhdukur duke e çuar numrin e viktimave në Mesdhe në të paktën 4 655 këtë vit”, sipas komisariatit të Lartë të OKB-së për refugjatët (HCR).