Polonia ul moshën e pensionimit: gratë 60, burrat 65 vjeç

17 Nëntor 2016 - 10:38      

Dhoma e Poshtme e Parlamentit të Polonisë të mërkurën ka ulur moshën për të shkuar në pension, 60 vjeç për gratë dhe 65 vjeç për burrat.

Këtë vendim e mbështetën 262 deputetë, 149 ishin kundër, ndërsa 19 abstenuan. Ulja e moshës për të shkuar në pension ka qenë premtimi kryesor parazgjedhor i partisë në pushtet, Ligji dhe Drejtësia (PiS).

“Doemos duhej të përmbushnim premtimin tonë. Zgjidhëm problemin e polakëve të zakonshëm, e jo të elitave”, u tha deputetëve kryeministrja e Polonisë, Beata Szydlo.

Ajo theksoi se Polonia posedon mjete të mjaftueshme për të financuar shkuarjen e hershme në pension të qytetarëve të vet.

Megjithatë, ekspertët ekonomikë dhe opozita në vend kritikojnë këtë masë si të shtrenjtë, duke pohuar se është kundër trendit evropian të rritjes së moshës për pension duke marrë parasysh plakjen gjithnjë e më të madhe të kontinentit të vjetër.