Gazetat gjermane solidarizohen me gazetën e opozitës turke “Cumhuriyet”

15 Nëntor 2016 - 15:05      

Rreth 40 gazeta gjermane publikuan sot një editorial të gazetarëve të së përditshmes opozitare turke “Cumhuriyet” me premtimin për të vijuar betejën për lirinë e medias pavarësisht arrestimeve të kolegëve të tyre.

Kjo gazetë, që doli kundër regjimit të president turk, Recep Tayyip Erdogan, përjetoi një situatë tronditëse pas arrestimit të kryetarit të bordit, Akin Atalay, kryeredaktorit Murat Sabuncu dhe tetë kolegë të tjerë në bazë të akuzave për lidhje me rebelët kurdë të PKK-së dhe imamin Fethullah Gülen. Ky i fundit, siç transmeton ATSH, është shpallur nga Ankaraja si orkestruesi i grushtit të dështuar të shtetit në muajin korrik.

Në tekstin e publikuar nga 37 organe të medias gjermane, kryesisht të titujve më të rëndësishëm si Die Welt, Die Zeit dhe Süddeutsche Zeitung, redaksia e Cumhuriyet vë në dukje se ne, shtetasit e këtij vendi kemi nevojë për lirinë e shprehjes, një çështje e pamohueshme për të gjithë shtetet demokratike.

“Profesioni ynë është i vështirë, presioni është i madh si dhe kërcënimi serioz. Por asgjë nuk do të na ndalë”, shkruajnë ata në një artikull të publikuar në gjermanisht dhe në turqisht.