Obama: Një Evropë e fortë dhe e bashkuar e rëndësishme për botën

15 Nëntor 2016 - 14:54      

Një Evropë e fortë dhe e bashkuar është e rëndësishme për botën, theksoi sot presidenti amerikan, Barack Obama, në ditën e parë të një vizitë që do të vijojë më pas në Gjermani.

“Ne mendojmë se një Evropë e fortë, me prosperitet dhe e bashkuar nuk është mirë vetëm për popujt e Evropës, por është mirë për botën dhe për SHBA-në”, citon ATSH deklaratën e presidentit amerikan që e dha gjatë takimit me presidentin grek, Prokopis Pavlopoulos, i cili e priti në pallatin presidencial.

Barack Obama, i cili do të qendrojë në Athinë deri të mërkurën, nënvizoi se ishte e drejtë në këtë udhëtim të fundit jashtë vendit të vizitonte djepin e demokracisë.

Ai nënvizoi progreset e bëra nga Greqia së fundi, në kohë ekonomike shumë të vështira.

“Ne jemi të kënaqur për progreset e realizuara, pavarësisht sfidave të rëndësishme në të ardhmen dhe synojmë të qëndrojmë krah për krah me popullin grek”, nënvizoi ai.

Obama i shprehu gjithashtu Greqisë mirënjohjen e botës për ndjenjën humanitare dhe mënyrën se si Greqia ka menaxhuar krizën e refugjatëve.

“Është e rëndësishme që të mos lëmë një vend të vetëm të mbajë barrën e këtyre sfidave”, theksoi ai.

Ai nënvizoi se marrëdhënia mes SHBA-së dhe Greqisë, brenda NATO-s, ishte shumë e rëndësishme dhe Aleanca Atlantike ishte guri i themelit për sigurinë tonë të përbashkët dhe prosperitetin.