Trump do t’i mbajë premtimet për murin me Meksikën dhe dëbimin e tre milionë njerëzve

13 Nëntor 2016 - 17:37      

Presidenti i sapozgjedhur amerikan Donald Trump në intervistën e parë pasi fitoi zgjedhjet presidenciale ka thënë se do të mbajë premtimin për të ndërtuar një mur në kufi me Meksikën dhe largimin e imigrantëve ilegalë kriminelë.

Duke folur për “CBS”, Trump ka thënë se në disa pjesë të caktuara për mur do të krijojë gardh.

“Për disa pjesë të caktuara, muri është më i përshtatshëm. Jam shumë i mirë në këtë, quhet konstruktim, dhe në disa pjesë mund të jetë gardh”, ka thënë Trump, transmeton koha.net.

Gjatë fushatës së tij ndaj demokrates Hillary Clinton, Trumpi ka përsëritur vazhdimisht se do të detyrojë Meksikën të paguajë për murin, pjesë e planit të tij për të siguruar kufijtë dhe për të forcuar ligjin e imigracionit.

Trump ka folur edhe për premtimin e tij për largimin e imigrantëve duke thënë se do të largojë deri në tre milionë “kriminelë”.

“Ne do të largojmë njerëzit që janë kriminelë dhe që kanë të kaluar kriminale, anëtarë të bandave, narkotrafikantët ndoshta dy milionë – mund të jetë tre – do t’i largojmë nga shteti”, ka thënë ai.

Trump fitoi bindshëm zgjedhjet e 8 nëntorit, edhe pse humbi në votë popullore.

© KOHA. Të gjitha të drejtat janë të rezervuara.