Shefi i NATO-s ka një porosi për Trumpin

13 Nëntor 2016 - 17:22      

Sekretari i Përgjithshëm i NATO-s, Jens Stoltenberg, ka paralajmëruar presidentin e zgjedhur amerikan Donald Trump që “të qenit i vetëm” nuk është opsion për Evropën dhe Shtetet e Bashkuara të Amerikës.

Ai tha se perëndimi është duke u përballur me sfidën më të madhe të sigurisë.

Gjatë fushatës së tij, Trump e ka përshkruar aleancën ushtarake perëndimore të NATO-s si të vjetërsuar.

Ai kishte thënë se SHBA-të duhen të mendohen dy herë para se të iu vijnë në ndihmë vendeve aleate të NATO-s, në qoftë se nuk kanë paguar detyrimet.

Në një shkrim për gazetën Observer të Britanisë, Stoltenberg pranoi se Trump kishte paraqitur nevojën e disa vendeve anëtare të NATO-s për kontribut më të madh financiar, pasi që SHBA-ja aktualisht llogaritet se mbulon 70 për qind të shpenzimeve të aleancës.

Por ai shtoi se liderët amerikanë e kanë pranuar gjithmonë se kishin një interes të thellë strategjik për një situatë të qëndrueshme dhe të sigurt në Evropë.