OKB shpreson mbështetjen ee Trump për të luftuar ndryshimet klimatike

10 Nëntor 2016 - 09:53      

Uashington, 10 nëntor – OKB-ja beson tek presidenti i sapozgjedhur i SHBA-së, Donald Trump për ta ndihmuar të luftojë kundër ngrohjes globale dhe të promovojë të drejtat e njeriut, deklaroi të mërkurën sekretari i përgjithshëm i Kombeve të Bashkuara, Ban Ki Moon.

“OKB-ja mbështetet në administratën e re për të forcuar bashkëpunimin ndërkombëtar në momentin që ne po punojmë së bashku për të mbështetur vlerat e përbashkëta, për të luftuar ndryshimet klimatike dhe promovuar të drejtat e njeriut”, theksoi ai në një deklaratë për median ku përshëndet Trumpin për fitoren.

Lufta kundër ngrohjes globale të planetit ishte një nga prioritetet e mandatit të Ban në krye të OKB-së, që përfundon në fund të këtij viti, ndërkohë që Trump ka bërë deklarata që e vënë në dyshim këtë fenomen.