Roth: Gjermania e hapur për të përndjekurit politik në Turqi

8 Nëntor 2016 - 13:05      

Gjermania është e gatshme të ofrojë strehim për gazetarë, politikanë dhe dijetarë në Turqi, të cilët janë të ekspozuar ndaj “persekutimit politik” të qeverisë turke, pas përpjekjes për grusht shtet tha sekretari i Shtetit në Ministrinë e Punëve të Jashtme të Gjermanisë, Michael Roth.

“Gjermania është një vend kozmopolit dhe është e hapur për të gjithë të përndjekurit politik. Ata mund të aplikojnë për azil në Gjermani”, tha Roth në një intervistë për të përditshmen “Die Welt”.

Ai ka thënë se përballja e autoriteteve turke me gazetarë, kundërshtarë politik dhe akademik nuk ka asnjë lidhje me vlerat tona evropiane, ligjet, demokracinë dhe media të lira.

Pas tentimit të grusht shtetit më 15 korrik autoritetet turke kanë arrestuar rreth 35 mijë njerëz, ndërsa javën e kaluar Turqia ka arrestuar nëntë gazetarë të gazetës opozitare “Cumhuriet”.