Gjermania arreston pesë pjesëtarë të ISIS-it, mes tyre një serbo-gjerman

8 Nëntor 2016 - 12:28      

Policia në Gjermani ka arrestuar të martën pesë të militantë të dyshuar islamikë nën akuzën e rekrutimit të luftëtarëve për ISIS-in në Siri, ka bërë me dije përmes një komunikate prokuroria federale.

Të pesë të arrestuarit – një irakian, një turk, një gjerman, një serbo-gjerman me dy shtetësi dhe një kamerunas – përballen me akuzën e ngritjes së “një rrjeti xhihadist” që ka tentuar të rekrutojë myslimanë për të shkuar në Siri dhe për të luftuar përkrah militantëve të Shtetit Islamik, raporton Reuters.

Rrjeti ia kishte dalë që të dërgonte një të ri dhe familjen e tij në zonën e kontrolluar nga ISIS në Siri, ka thënë prokuroria, por nuk kanë dhënë detaje tjera.

Rreth 820 persona kanë ikur nga Gjermania për t’u bashkuar me luftëtarët e ISIS-it në Siri e Irak ndërsa zyrtarët dyshojnë se ata mund të jenë rrezik për sigurinë shtetërore me t’u kthyer në vend.

Pesë të dyshuarit u arrestuan gjatë bastisjeve në shtetet e Saksonisë së Ulët dhe North-Rhine Westphalia. Ata kishin mbajtur ligjërata fetare gjatë të cilave, rekrutëve potencialë u kishin dhënë materiale “të islamit radikal”, kanë thënë prokurorët.

I dyshuari kryesor është identifikuar si Ahmad Abdulaziz Abdullah A, një 32 vjeçar nga Iraku, përkrahës i hapur i Shtetit Islamik që akuzohet për mbikëqyrje të procesit të rekrutimit dhe aprovimit të atyre që shkojnë në Siri.

“Kjo është një goditje e fortë e skenës ekstremiste në Gjermani”, ka thënë ministri i Drejtësisë, Heiko Maas, transmeton Koha.net.

Sipas të dhënave të inteligjencës gjermane, thuhet se në vend jetojnë rreth 8,900 myslimanë ultra-konservatorë. Rreth 500 prej tyre konsiderohen si rrezikues të sigurisë, që do të thotë se ata janë të gatshëm të kryejnë vepra të dhunshme, kanë thënë zyrtarë gjermanë të sigurisë.  

© KOHA