Prokuroria malazeze akuzon rusët dhe serbët për grushtin e shtetit

8 Nëntor 2016 - 10:10      

Prokuroria malazeze akuzoi nacionalistët serbë dhe rusë për organizimin e një grupi kriminal me qëllim rrëzimin e qeverisë së Milo Gjukanoviq në ditën e zgjedhjeve të përgjithshme të mbajtura më 16 tetor.

Kryerprokurori special për Krimin e Organizuar, Milivoje Katniq, siç transmeton TCh, tha në një konferencë të jashtëzakonshme ditën e diel se provat janë të mjaftueshme dhe se ato sugjerojnë se grupi kriminal është formuar në Rusi, Serbi dhe Malin e Zi.

Sipas tij, qëllimi ishte rrëzimi i Gjukanoviqit, i njohur për kursin e tij properëndimor qeverisës.

“Planifikonin ndërmarrjen e disa sulmeve terroriste për të rrëzuar qeverinë e dalë nga zgjedhjet. Nuk kemi prova që në këtë grup vetë shteti rus të ketë luajtur ndonjë rol, por dy anëtarë të grupit të arrestuar janë me kombësi ruse”, deklaroi Katniq.

Përmes një videoje prej 3 minutash, prokurorët malazezë bënë publike edhe materialet e sekuestruara. Uniforma, pranga, armë, telefona, mjete të policisë, përfshirë këtu edhe tela me gjemba për të bllokuar rrugët dhe sinjalistika të tjera të përdorura nga forcat e sigurisë si dhe dhjetëra armë e bomba. Të gjitha këto ishin pjesë e materialeve që janë bllokuar në cilësinë e provës.

Ditën e zgjedhjeve më 16 tetor, një grup prej 20 shtetasish serbë, përfshirë këtu edhe ish-komandantin e xhandarmërisë serbe, Bratislav Dikiq, u arrestuan me akuzën e planifikimit të grushtit të shtetit.

Prokuroria malazeze beson se këta persona, në bashkëpunim me njëri-tjetrin planifikonin të merrnin me forcë Parlamentin, të vrisnin kryeministrin Gjukanoviq dhe të sillnin në pushtet opozitën, që është një koalicion prorus.

Hetuesit dyshojnë se grupi ka bashkëpunuar me disa prej politikanëve kryesorë të opozitës, veçanërisht ata të partisë së serbëve. Kjo ka ngjallur reagimin e këtyre të fundit, që akuzuan prokurorinë për fabrikim provash dhe kërkuan prej saj që të publikojë emrat se cilët janë politikanët që kanë bashkëpunuar me grupin në fjalë.