Zgjedhjet e botës

6 Nëntor 2016 - 08:02      

Se kë e vë Amerika në krye të Shtëpisë së Bardhë më 8 nëntor ka peshë të madhe për mbarë botën, përfshirë Kosovën dhe Ballkanin. Kjo, ngase janë pikërisht presidentët amerikanë ata që e kanë pushtetin më të madh për t’i formësuar politikat e jashtme të botës. Ata kanë qenë edhe forca kryesore që ka përcaktuar fatin e Kosovës.

Të martën, më shumë se 120 milionë votues amerikanë pritet që ta hedhin votën në zgjedhjet për presidentin e tyre të ardhshëm. Dy kandidatët kryesorë në këto zgjedhje janë Hillary Clinton, ish-Zonja e Parë dhe ish-Sekretarja amerikane e Shtetit, dhe Donald Trump, biznesmen i kthyer në politikan, shkruan sot “Koha Ditore”.

Pa marrë parasysh se cili do të jetë shefi i ri i Shtëpisë së Bardhë, Kosova dhe Ballkani duket se qysh moti nuk janë më prioritet në politikën e jashtme të Shteteve të Bashkuara të Amerikës, duke pasur parasysh krizat e shumta në Lindje të Mesme dhe në vatrat e tjera të krizës në botë.

Këtë e thotë profesori i shkollës për studime të avancuara ndërkombëtare në universitetin “John Hopkins” dhe njohës i mirë i rrjedhave në Ballkan, Daniel Serwer, në një intervistë për “Kohën Ditore”.

“.... Shtetet e Bashkuara të Amerikës kanë tani aq shumë çështje të tjera, me të cilat duhet të merren në vendet e tjera të botës. Ne presim që miqtë dhe aleatët tanë në Ballkan t’i zgjidhin problemet e tyre vetë, për aq sa munden, me mbështetjen e Bashkimit Evropian”, ka thënë Serwer, i cili njëherësh ka qenë edhe ndërmjetës në mes të kroatëve dhe boshnjakëve, si dhe negociatori që e siguroi marrëveshjen e parë të arritur në bisedimet në Dayton për paqen në Bosnjë- Hercegovinë... (më gjerësisht lexoni sot në “E diela me Koha Ditore”)

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.  

© KOHA. Të gjitha të drejtat janë të rezervuara.