Singjeliqin e arrestuar për terrorizëm në Mal të Zi, tani e kërkon edhe Ukraina

4 Nëntor 2016 - 14:21      

Podgoricë, 4 nëntor – Organet ukrainase të Sigurisë, sipas “Vijestit” të Podgoricës, kanë kërkuar ekstradimin e Aleksandar Singjeliqit nga Beogradi, i cili aktualisht ndodhet në burg në Mal të Zi, për shkak të pjesëmarrjes në anën ruse në rajonin Donbas.

“Vijesti” rikujton se Singjeliq po mbahet në burgun e Spuzhës , i dyshuar si një nga organizatorët e grupit kriminal për të vrarë qytetarë të Malit të Zi dhe për të arrestuar kryeministrin Millo Gjukanioviqin në natën e mbajtjes së zgjedhjeve të përgjithshme në këtë vend.

Ai u arrestua më vonë në Serbi dhe u ekstradua në Mal të Zi, ndonëse avokati i tij thotë se ai u vetëdorëzua.
“Vjesti” i Podgoricës citon portalin e Qendrës ukrainase për hetimin e krimeve kundër sigurisë kombëtare, paqes, sigurisë dhe të drejtës ndërkombëtare ku ndodhen të dhënat për Singjeliqin, fotografi nga fushëbetejat në Ukrainë, komentet e tij në rrjetet sociale të cilat dëshmojnë pjesëmarrjen e tij në luftën e atjeshme.

Bëhet e ditur se Singjeliqit i është caktuar paraburgimi 30 ditësh.
Singjeliq dhe ish shefi i Zhendarmerisë së Serbisë, Bratisllav Dikiq, dyshohen se kanë organizuar grupin njëzet anëtarësh terrorist që duhej të kryente aksione një natë para mbajtjes së zgjedhjeve në Mal të Zi.