ISIS merr përgjegjësinë e sulmit me thikë në Hamburg

30 Tetor 2016 - 09:45      

Një përkrahës i Shtetit Islamik ishte përgjegjës për sulmin me thikë ndaj dy të rinjve në Hamburg të Gjermanisë dy javë më parë, ka bërë me dije agjencia e lajmeve e grupit terrorist të dielën, Amaq.

Në incident, kryesi i panjohur i aktit sulmoi një çift të rinjsh që ishin ulur nën një urë në lumin Alster në qendër të Hamburgut. Ai theri me thikë 16 vjeçarin disa herë nga prapa dhe e goditi me shkelma shoqëruesen e tij 15 vjeçe duke e hedhur në lumë, transmeton Koha.net.

Viktima e therur me thikë vdiq pas pak minutash në spital ndërsa vajza e re ia kishte dalë të mbijetonte.

“Një ushtar i Shtetit Islamik ka therur dy individë në qytetin e Hamburgut më 16 të këtij muaji”, ka thënë Amaq, raporton Reuters. “Ai ka kryer këtë operacion si reagim ndaj thirrjeve për të sulmuar qytetarët e shteteve të koalicionit”.

Një zëdhënëse e policisë në Hamburg nuk ka pranuar të komentojë deklaratën e Shtetit Islamik dhe i është referuar vetëm një deklarate të mëhershme të policisë.  

© KOHA