Nisin votimet e parakohshme në 38 shtete të SHBA-ve

13 Tetor 2016 - 12:58      

8 nëntori është ende larg, por në Ohajo kanë nisur të hidhen votat e para të zgjedhjeve presidenciale amerikane.

Votimet e parakohshme po fillojnë në disa shtete, ku njerëzit janë vënë në radhë për të ushtruar të drejtën e tyre kushtetuese. 38 prej 50 shteteve amerikane kanë një lloj votimi të hershëm në garën e sivjetshme mes demokrates Hillary Clinton dhe republikanit Donald Trump.

Nxitja e simpatizantëve për të votuar shpejt ka qenë pjesë e rëndësishme e përpjekjeve të të dyja partive të mëdha.

Nëse zgjedhjet do të ishin mbajtur javën e kaluar, siç tregojnë projeksionet e fundit, Clinton do të kishte shanse dërrmuese për të siguruar minimumin e 270 votave të kolegjit elektoral, aq sa nevojitet për t’u bërë presidenti i ardhshëm i Amerikës.

Trump ndërkohë është duke humbur terren në disa prej shteteve ku fitorja i nevojitet shumë dhe skandali me gratë duket se po i kushton goxha.

Pas videos së bujshme me komente denigruese për femrat, miliarderit iu desh të përballej edhe me akuzat e dy grave të tjera. Donald Trump - thanë ato për “New York Times”, i ngacmonte femrat si të ishte oktapod. “U ngjishej e i puthte me zor”, thanë ato.

Stafi i fushatës së Trump reagoi menjëherë. “Ky artikull është i gjithi fiktiv dhe për “NYT” është e rrezikshme që publikon një shkrim të tillë krejtësisht të rremë e të thurur në mënyrë të tillë për të goditur karakterin e zotit Trump”, deklaroi zyra e shtypit.

Por gratë nuk janë problemi i vetëm i miliarderit. Përmes një proteste jo të zakonshme, meksikanët i kujtuan kandidatit republikan se nuk e kanë harruar etiketimin që u ka bërë si “përdhunues” e “trafikantë droge”.

Tubuesit në Meksiko Siti qëlluan fort me shkop njëri pas tjetrit një kukull që i ngjasonte manjatit njujorkez. Kjo ishte mënyra e tyre për të shfryrë zemërimin ndaj politikanit kontrovers.

“Protesta jonë është kundër atij idiotit. Trump është një ksenofob, një racist dhe dëmi që i ka bërë komunitetit tonë tani nuk zhbëhet më”, deklaroi Maria Garcia, një prej protestuesve.

Sipas sondazheve të fundit, Trump është tetë pikë përqindjeje pas Hillary Clinton.