Gjermania ndalon një të dyshuar për terrorizëm

10 Tetor 2016 - 08:39      

Policia gjermane bëri me dije se mundi të arrestojë një të dyshuar që besohet se po përgatiste një sulm me bombë. Autoritetet gjermane thanë se pas disa orësh kërkime, mundën që të arrestojnë personin në fjalë në qytetin e Lajpcigut.

I dyshuari është identifikuar si refugjati sirian Jaber al-Bakr, fotoja dhe emri i të cilit u bënë publikë që para arrestimit, ndërsa policia kreu një operacion në një apartament në afërsi të qytetit Çemnitz, të shtunën. Më pas, hetuesit publikuan të dhënat e të dyshuarit duke kërkuar ndihmën e publikut për arrestimin e tij.

Gjatë kontrolleve në banesë, u gjetën sasi të konsiderueshme eksplozivi të paqëndrueshëm. Ndërsa kjo sasi u largua nga banesa për t’u shpërthyer në mënyrë të kontrolluar, 100 banorë u evakuuan nga blloku i apartamenteve.

Mediat gjermane bënë me dije se tre persona të tjerë kanë rënë gjithashtu në pranga, pasi dyshohet se kanë pasur lidhje me Jaber al-Bakr dhe mund ta kenë ndihmuar në planin e tij. Policia gjermane është treguar e kursyer në detaje për shkak të hetimit që vazhdon, por, sipas mediave, i dyshuari ishte në hapat finalë të komplotit të tij terrorist dhe autoritetet nuk mund të prisnin, pasi ai duhej ndalur.