KiE i kërkon Turqisë t’i japë fund sa më shpejt gjendjes së jashtëzakonshme

7 Tetor 2016 - 11:21      

Strasburg, 7 tetor – Ankaraja duhet t’i japë fund sa më shpejtë gjendjes së jashtëzakonshme, të vendosur pas grushtit të shtetit të dështuar, deklaroi dje komisioneri për të Drejtat e Njeriut në Këshillin e Evropës, ndërkohë që Qeveria turke sapo e zgjati me tre muaj.

Komisioneri Nils Muiznieks insistoi mbi “urgjencën për t’u rikthyer në procedurat dhe garancitë e zakonshme, duke i dhënë fund sa më shpjetë gjendjes së jashtëzakonshme”.

Muiznieks shpreh keqardhje për vendimin e qeverisë për të zgjatur këtë periudhë me tre muaj dhe thotë se “shpreson që ajo të mund të shkurtohet”.

Pa vënë në diskutim vendimin e Ankarasë për të deklaruar gjendjen e jashtëzakonshme dhe për të deroguar nga Konventa Evropiane e të Drejtave të Njeriut në situata të jashtëzakonshme, ai thekson se “dekretet e miratuara në Turqi pas korrikut i kanë dhënë fuqi gati të pakufizuara autoriteteve administrative dhe ekzekutivit dhe se ky lloj pushteti sjell gjithnjë në nivel arbitrariteti”.