Së paku 339 të vdekur nga uragani në Haiti

7 Tetor 2016 - 09:22      

Është rritur në mënyrë drastike numri i viktimave të uraganit Matthew në Haiti. Autoritetet kanë konfirmuar së paku 339 persona të vdekur, teksa ekipet e shpëtimit për herë të parë arritën në qytetet e izoluara që janë shkatërruar thuajse tërësisht nga stuhia e fuqishme, transmeton njoftimet KTV.

Shkatërrimi që ka lënë ky uragan në Haiti ka rritur frikën se atje mund të shpërthejë epidemia e kolerës, përderisa vërshimet nga stuhia kanë ndotur ujin dhe rezervat e ushqimit janë të pakta.

Stuhia e fuqishme është nisur drejt veriperëndimit të Shteteve të Bashkuara, duke bërë që presidenti Barack Obama të shpallë gjendje të jashtëzakonshme në Florida dhe Karolinën Jugore, përderisa këto shtete i janë bashkuar shtetit Georgia, ku guvernatori atje ka urdhëruar evakuimin e të paktën tre milionë njerëzve që jetojnë në zonat bregdetare.

© KOHA. Të gjitha të drejtat janë të rezervuara.