Zvicra drejt ndalimit të plotë të ferexhesë

29 Shtator 2016 - 08:14      

Zvicra ka bërë një hap më afër ndalimit të ferexhesë në nivel shteti, pasi që politikanët e miratuan projektligjin e ri me vetëm një votë dallim, shkruan sot Koha Ditore.

Ligji i ri, i propozuar nga Partia Popullore zvicerane e krahut të djathtë (SVP) ka marrë 88 vota, derisa 87 kanë qenë kundër dhe 10 ligjvënës kanë abstenuar, në Dhomën e Ulët të Parlamentit Zviceran. Por, planet mbesin ende larg realizimit, pasi që një ndalesë e ngjashme për gratë myslimane, që mbulojnë fytyrën nuk kishte kaluar në një komision parlamentar, gjatë janarit.

Walter Wobmann, politikan i SVP-së, që është vënë në krye të fushatës, ka deklaruar se ligji “do të ndihmonte në ruajtjen e rendit publik, ashtu si edhe do të respektonte dinjitetin e gruas”.

I njohur për qëndrimin e tij kundër emigrimit, ai më herët ka thënë se ishte “e papranueshme” që gratë të mbajnë shami në fotografitë e pasaportave, teksa ishte zotuar të “ndalte islamizimin e mëtejmë në Zvicër”, duke e mbështetur ndalesën e 2009-s për minaret, shkruan sot më gjerësisht Koha Ditore.

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.