Prokuroria e Bosnjës thërret Dodikun në seancë dëgjimore për referendumin

26 Shtator 2016 - 17:55      

Prokuroria e Bosnjë dhe Hercegovinës i ka dërguar presidentit të Republikës Serbe, Milorad Dodik, thirrjen për seancë dëgjimore në cilësinë e të dyshuarit në lëndën që ndërlidhet me referendumin në këtë entitet, u ka konfirmuar mediave zëdhënësi i Prokurorisë së BeH, Boris Grubeshiq.

Prokuroria e Bosnjë dhe Hercegovinës nuk ka dashur që të spekulojë se “çfarë do të ndodhë nëse Dodik e refuzon thirrjen dhe njëkohësisht as edhe sa gjatë do ta pres Prokuroria e BeH Dodikun që t’i përgjigjet thirrjes”.

Në prokurorinë e BeH thonë se e kanë ‘hartuar lëndën në lidhje me moszbatimin e vendimit të Gjykatës Kushtetuese të Bosnjë e Hercegovinës’, transmeton rel.

Serbët e Bosnjës votuan me shumicë dërmuese për të shënuar 9 janarin si Ditën e Shtetësisë, në një referendum kundërthënës që u zhvillua më 25 shtator në kundërshtim të vendimit të Gjykatës Kushtetuese.

Referendumi u kundërshtua nga autoritetet në Sarajevë, që e cilësuan si anti-Dayton dhe një akt kundër kushtetues. Kundër referendumit janë shprehur edhe Këshilli Drejtues për zbatimin e paqes (PIC), Zyra e Përfaqësuesit të Lartë në Bosnjë dhe Hercegovinë, Ambasada e SHBA-së, Bashkimi Evropian dhe vendet fqinje Kroacia e Serbia.