Bombardohet Halepi, 66 civilë të vrarë e 178 të plagosur

26 Shtator 2016 - 13:48      

Halep, 26 shtator – Forcat e regjimit sirian dhe ato ruse edhe sot kanë vazhduar sulmet e ashpra ajrore në qytetin e Halepit dhe sipas Mbrojtjes Civile nga këto sulme janë vrarë të paktën 66 persona dhe 178 civilë janë plagosur.

Përfaqësuesi i lokal i Mbrojtjes Civile Najib Ansari për AA tha se helikopterët e forcave të regjimit të presidentit sirian Bashar al-Asad dhe Forcat Ajrore të Rusisë sot bombarduan lagjet e Halepit, el-Kallas, Bustan al-Basha, Ard El Hamra, Tariq al-Báb, Mesir, Zinbdie, Salihiya dhe Ansar, dhe të gjitha këto lagje aktualisht janë nën rrethimin e ushtrisë siriane.

Burimi i njëjtë bënë të ditur se sulmet ajrore në Halep edhe sot janë kryer me bomba shkatërruese fuçi dhe bomba me fosfor dhe se shumica e viktimave janë gra dhe fëmijë.

"Në tre ditët e kaluara nga sulmet ajrore të regjimit dhe forcave ruse në Halep 244 persona janë vranë dhe 651 të tjerë janë plagosur", thotë përfaqësuesi i Mbrojtjes Civile, Najib Ansari, duke shtuar se qyteti pothuajse tërësisht është shkatërruar.

Bashkësia ndërkombëtare, përfshirë edhe Kombet e Bashkuara, kanë dënuar ashpër bombardimin e Halepit.