Helmohen aksidentalisht me ujë radioaktiv burimet e ujit në Florida

17 Shtator 2016 - 21:59      

Rreth 980 milionë litra ujë i kontaminuar ka rrjedhur në burimin më të madh nëntokësor të ujit të pijshëm në Florida të Shteteve të Bashkuara të Amerikës.

Rrjedhja ndodhi pas hapjes së një grope gjigante poshtë një impianti fertilizuesish kimikë në afërsi të Tampas, duke dëmtuar depozitën qendrore të tij, transmeton tch.

Uji me radioaktivitet të lehtë është derdhur kështu në njërin prej burimeve kryesore të nëndheshme të ujit të pijshëm në këtë shtet. Gropa e hapur kishte një diametër prej 14 metrash.

Kompania përgjegjëse “Mosaic”, prodhuesja më e madhe e fosfatit në botë u përpoq të qetësonte opinionin publik me pretendimin se uji i kontaminuar nuk do të mbërrijë në shtëpinë e banorëve pasi lëviz shumë ngadalë, ndërsa situata tashmë po monitorohet e është vënë nën kontroll.

Në zonë ka nisur menjëherë puna për tërheqjen e ujit të ndotur me pompa, por njerëzit janë trembur e po përdorin vetëm ujë të blerë.