BE zgjatë edhe për gjashtë muaj sanksionet ndaj Rusisë

7 Shtator 2016 - 14:17      

Ambasadorët në Bashkimin Evropian kanë zgjatur afatin e ngrirjes së aseteve dhe ndalimin e udhëtimit për 146 persona dhe 37 subjekte, që sipas bllokut, kanë kërcënuar integritetin territorial të Ukrainës.

Ky vendim për zgjatjen e masave edhe për gjashtë muaj është marrë sot, transmeton REL.

Sanksionet fillimisht ishin prezantuar në mars të vitit 2014, në përgjigje të aneksimit të paligjshëm të Krimesë nga Rusia.

Nga këto sanksione preken disa kompani në Krime dhe disa batalione të krijuara nga separatistët e mbështetur nga Rusia në lindje të Ukrainës, si dhe politikanë rusë, siç është zëvendëskryeministri Dmitry Rogozin dhe Dmitry Kiselyov.

Sanksionet e BE-së kanë për cak sektorët e energjisë, ushtrisë dhe ekonomik të Rusisë.

Sipas vendimit të marrë sot, sanksionet do të jenë në fuqi deri më 31 janar por liderët e BE-së do të diskutojnë në tetor për to, kur të takohen në samitin e BE-së në Bruksel.