Arrestohen 5 shtetas të Maqedonisë në Turqi për lidhje me ISIS-in

27 Gusht 2016 - 22:04      

Ministri i Punëve të Brendshme i Maqedonisë, Mitko Çavkov, njoftoi se më datë 12 gusht në aksionin policor “Celula 3” të realizuar në bashkëpunim me policinë turke, nga liria janë privuar pesë qytetarë të Maqedonisë të dyshuar si të anëtarësuar në organizatën terroriste ISIS, që synonin të merrnin pjesë në luftërat në Siri.

Çavkov theksoi se aksioni është kryer nga ana e policisë turke në vendbanimin Aksaraj, ku të dyshuarit, tre nga Kumanova dhe dy nga Shkupi, ishin të vendosur në një nga ambientet ku mblidhen anëtarët e ISIS-it.

“Këta persona në mënyrë të organizuar u përpoqën të bashkohen me organizatën terroriste. Në këtë ambient ata ishin të vendosur së bashku me katër persona tjerë nga Shqipëria, Siria, Palestina dhe nga Maroku të cilët prisnin për kushte më të favorshme për transferim në Siri”, deklaroi Çavkov, raporton AA.

Çavkov njoftoi se dy të dyshuarit nga Kumanova të moshës 21 dhe 24 vjeçare nga vendkalimi kufitar Tabanoc u nisën për në Turqi më datë 22 të muajit të kaluar, ndërsa tre të tjerët, një nga Kumanova dhe dy nga Shkupi të moshës 18, 19 dhe 20 vjeçare u nisën për në Turqi në fund të muajit të kaluar nga vendkalimi kufitar Bogorodica. Ai shtoi se zhdukja e dy prej tyre është raportuar në polici edhe nga prindërit e tyre.

Ministri bëri të ditur se më datë 14 gusht në bashkëpunim me policinë shqiptare, në Tiranë është arrestuar edhe një person tjetër në kërkim për të cilën është duke u zhvilluar procedura për ekstradimin e tij. Siç informoi ai, ndaj 23 personave është duke u kryer procedura penale, rreth 25 qytetarë të Maqedonisë kanë humbur jetën në këto luftëra, ndërsa rreth 50 persona të tjerë ende ndodhen në luftërat në Siri dhe Irak.