Emirateve të Bashkuara Arabe i dorëzohen 15 të burgosur të Guantanamos

16 Gusht 2016 - 10:07      

Të paktën 15 të burgosur në bazën amerikane të Guantanamos, në Kubë, janë transferuar dhe u janë dorëzuar Emirateve të Bashkuara Arabe.

Bëhet fjalë për transferimin më të madh të të burgosurve gjatë periudhës së administratës së presidentit Barack Obama.

Të burgosurit janë 12 jemenas dhe 3 afganë. Pentagoni ka njoftuar se tashmë në burgun famëkeq kanë mbetur 61 të burgosur.

Obama ka përsëritur disa herë synimin e tij për të mbyllur Guantanamon, pavarësisht kundërshtimit nga Kongresi.

Sipas Naureen Shah, nga Amnesty International, “ky transferim është një sinjal i fuqishëm i faktit se presidenti synon ta mbyllë qendrën e burgimit brenda mandatit të tij”.

Burgu në gjirin e Guantanamos ndodhet në një bazë detare amerikane në jug-lindje të Kubës. Ish-presidenti George W. Bush hapi dyert e burgut në janar të vitit 2002 për të mbajtur atje të dyshuarit për terrorizëm pas sulmeve të 11 shtatorit 2001 në Nju Jork.

Kompleksi, kostoja për mirëmbajtjen e të cilit arrin në 445 milionë dollarë në vit, ka mbajtur brenda mureve të tij rreth 700 të burgosur.

Në muajin prill, 9 shtetas jemenas u transferuan prej andej në Arabinë Saudite.