“Aleanca” kundër Perëndimit, Putin pret Erdoganin

9 Gusht 2016 - 17:05      

“Drejt Rusisë me dashuri”. Kështu duket se u nis Presidenti turk Rexhep Tajip Erdogan drejt Moskës në vizitën e parë që nga rrëzimi i avionit rus vitin e shkuar. Ai u prit nga Vladimir Putin në Shën Petersburg.

Për shefin e Ankarasë kjo është një vizitë historike. Ai e ka cilësuar si një fillim të ri takimin e tij me homologun rus Putin. Për “Russia Today”, nuk kishte si të ndodhte ndryshe.
Pritshmëritë e Ankarasë janë të larta, pasi Turqia po vuan pasoja të rënda ekonomike që nga koha e ndërprerjes së bashkëpunimit në shumë fusha me Moskën.

Por ishte incidenti ajror ai që provokoi një furtunë diplomatike.

“Rrezimi i avionit për ne ishte një thike pas shpine e ndërmarrë nga bashkëpunëtorët e terrorizmit”, ishte deklarata e Putin në muajin nëntor, ndërsa tani edhe shefi i Kremlinit duket më i zbutur në retorikën e tij, kjo sepse vizita e Erdogan në St Petersburg është sigurisht në interesin e Vladimrit.

Vizita e parë e Rexhep Tajip Erdogan jashtë kufijve të Turqisë pas grushtit të shtetit po bëhet pikërisht në Moskë. Kjo ka domethënie simbolike për anëtarët e NATO-s thonë analistët.

“Erdogan zgjedh Putinin në mesin e shumë aleatëve perëndimorë”. Kjo pasi, sikurse shkruan “New York Times”, ka një ndjenjë të thelluar zemërimi të Turqisë dhe Perëndimi ka dështuar në testin solidaritetit, duke iu referuar kërcënimit për qeverinë që erdhi më 15 korrik nga grushti i shtetit.