Serbia proteston kundër shtatores së Bareshiqit në Kroaci

2 Gusht 2016 - 18:31      

Serbia ka protestuar fuqishëm kundër një shtatoreje të një luftëtari ultranacionalist për pavarësi në Kroaci, i cili e kishte vrarë ambasadorin e ish-Jugosllavisë në Stokholm të Suedisë, në vitin 1971.

Ministria e jashtme e Serbisë dje ka kërkuar largimin e shtatores së personit, Miro Bareshiq, që është përuruar pardje në fshatin bregdetar kroat, Drage.

Në ceremoninë e zbulimit të shtatores kanë marrë pjesë anëtarë të qeverisë së Kroacisë dhe personalitete të njohura publike.

Miro Bareshiq ishte mbështetës i ustashëve, që kishin formuar një regjim kukull nazist, dhe kishte zhvilluar fushatë dhe luftë për pavarësinë e Kroacisë nga Jugosllavia.

Ai e ka vrarë ambasadorin, Vlladimir Rolloviq, në Ambasadën e atëhershme të Jugosllavisë në Stokholm dhe ishte dënuar me burg të përjetshëm në Suedi.

Në vitin 1991, Bareshiq ishte liruar nga burgu dhe ishte kthyer në Kroaci, ku ishte vrarë gjatë luftës kundër forcave serbe.

Ky person në Serbi konsiderohet terrorist, ndërsa në mesin e shumë kroatëve ai shihet si hero, për shkak të përkushtimit të tij për pavarësinë e Kroacisë.