Sa do t’i kushtojë Samsungut tërheqja e Galaxy Note 7

5 Shtator 2016 - 14:42      

2.5 milionë Samsung Galaxy Note 7 janë shitur para se kompania të njoftojë për tërheqjen globale të këtij fableti për shkak të problemit me bateri.

Natyrisht, kjo tërheqje do të ketë një ndikim të fortë financiar në gjigantin e teknologjisë, por sa është shifra?

Kur është pyetur në lidhje me këtë ndikim financiar, kreu i departamentit për smartfonë në Samsung, Koh Dong-Jin, vetëm tha se kjo është një “shumë marramendëse”, raporton GSM Arena, transmeton Koha.net.

Sipas analistëve, tërheqja do t’i kushtojë Samsungut diku rreth një miliard dollarë. Kjo nuk është një shumë e vogël. Ajo ende përfaqëson më pak se 5 për qind të të ardhurave neto të parashikuara nga kompania jug-koreane për këtë vit. Po ashtu, gjasat janë që edhe kompania e cila ka furnizuar Samsungun me bateritë me defekte (emri i të cilës nuk është zbuluar) të përkrah një pjesë të kostos së tërheqjes.

Për ata që nuk e dinë, rreth 70 për qind të Galaxy Note 7 ishin furnizuar me bateritë nga “Samsung SDI Co.”, ndërsa pjesa e mbetur [30 për qind] nga kompania kineze prodhuese e baterive “Amperex Technology”.

© KOHA