Volkswagen ndan 1.2 miliard dollarë për tregtarët e veturave në SHBA

1 Tetor 2016 - 16:02      

Volkswagen ka konfirmuar të premten se do të paguajë 1.21 miliardë dollarë shitësve të veturave të tij në SHBA, për rregullimin e veturave të prekura nga skandali me emitimin e gazrave, Dieselgate, si pjesë e pagesës prej 16.5 miliardë dollarë që pritet t’i kushtojë në total ky skandal.

Të gjithë 652 shitësit e Volkswagen në SHBA pritet të marrin nga 1.85 milionë dollarë secili, gjatë 18 muajve të ardhshëm.

Si pjesë e marrëveshjes ndërmjet Volkswagenit dhe ligjvënësve në SHBA, ata nuk do të shesin asnjë veturë me diesel të modeleve 2016 dhe 2017, ndërsa këtë ndalesë e ka që nga fillimi i vitit 2015, kur edhe u zbulua ky skandal, transmeton koha.net.

Si pjesë për rregullimin e këtij skandali, VW do paguajë tregtarët e veturave të tyre, për shkak se ata nuk mund të shesin asnjë veturë diesel.

Ndërsa këtë gjë ende nuk e ka aprovuar gjykata federale në SHBA, sipas Reuters pritet të ndodhë së shpejti.

© KOHA