Aromë Shqipërie në Bruksel

3 Maj 2014 - 19:26      

Ansambli i Këngëve dhe Valleve Popullore zotëroi për disa orë qendrën e Brukselit, në kuadër të edicionit të 8-të të festivalit ‘Balkan Trafik’.

“Kemi ardhur me një koncept tjetër nga 2009, duke mbështetur kryesisht grupin e valleve, pasi duhet qe vallet shqiptare janë të veçanta”, thotë Sulejman Balteza, drejtor artistik i Ansamblit Kombëtar.

“Nuk kam dëgjuar kurrë muzikë shqiptare por ngjan pak me atë bullgaren, ndaj tentuam të kërcenim me valltarët tuaj”, thotë një qytetare bullgare.

“Shkoj çdo vit në “Balkan Trafik” dhe njoh edhe muzikën shqiptare sepse ata ftohen çdo vit”, thotë një qytetare rumune.

“Të gjitha këto kërcime i kam mësuar këtu në Belgjikë, por ka shumë njerëz që kërcejnë se do isha futur në valle, pa problem.”

“Vërtetë s’patëm fat, në fillim ra shi, por për çudi të gjithë ndenjën. Ne shpërndamë mbrojtëse plastike, pastaj koha u hap dhe shqiptarët erdhën. Këtë vit kemi mbledhur zëra të ndryshëm tipik të rajoneve të ndryshme ballkanike, si polifonia shqiptare, ajo bullgare, arumun, si dhe një projekt tërësisht i yni që bazohet tek gratë e Ballkanit”, thotë Nicolas Wiewrs, organizator i “Balkan Trafik”.

“Faktikisht më kishte marrë malli të vishja kostum civil, megjithatë nesër do dal me kostumin popullor, atë që kam veshur gjithmonë, kështu që nuk i ndahem traditës dhe më vjen mirë që në këtë shesh kaq të madh e kaq të bukur, unë shoh shumë shqiptarë që e dashurojnë folklorin shqiptar dhe e duan traditën tonë. Në moshën 16 vjeç kam bërë turneun e parë në Kosovë e gjithë populli shqiptar aty dogji xhaketat, çadrat, na bënë dritë se ikën dhe dritat dhe fatmirësisht u hap koha kur filluam të kërcenim ne. Edhe këtu, kur erdhëm pamë grupin e bullgarëve që po kërcenin dhe filloi shi dhe faktikisht, jo se na trembi shiu, por thamë gjynah do na prishen kostumet. Megjithëse ka të bëjë shumë, kur vinë shqiptarët e hapin kohën”, thotë Rexhep Çeliku, koreograf e valltar i Ansamblit.

Ndërsa luanin bullgarët, shqiptarët shmangën shiun duke u mbledhur nëpër kafenetë pranë sheshit kryesor. Një rast i mirë fushate elektorale për kandidatin, Amet Gjana, i cili pozicionohet i 24-ti në listën e PS për zgjedhjet rajonale të Brukselit më 25 Maj.

Valltarët e Tiranës gjetën një shesh të ngrohur nga valltarët e rinj të mërgatës, që me ritme e veshje tradicionale hynë në sheshin kryesor të Brukselit, nismë kjo që u përgëzua nga drejtori i TOB-së, Ilir Kerni.

“Kërcejnë shumë mirë dhe kostumet shume të bukura që kanë me shume rëndësi, pasi duhet t’i ruajmë kostumet. Veshje me fustanellë nuk kishte fare, por vetëm veshje veriu, gjë që më ra në sy”, thotë Besmik Aga.

“Ne i kemi fustanellat, por meqë sot ishte një paradë e shkurtër dhe këtu nuk kishim ku të ndërroheshim, se ne në program i kemi të gjitha kostumet e trevave shqiptare, por është një emocion i madh e i këndshëm sidomos kur je larg Shqipërisë, larg vendit tënd”, thotë Aishe Morina, drejtuese e grupit të valltarëve të komunitetit.

Kënga e vallja shqiptare vijon deri të dielën në Pallatin e Arteve të Bukura, Bozar, ku Ansamblit Kombëtar i bashkëngjitet dhe grupi polifonik jonian. /tch/