Zuvdi Hoxhiqit-Berishës çmimi kryesor për letërsi në Mal të Zi

10 Shkurt 2017 - 13:22      

Autori i një varg veprave me peshë domethënëse jo vetëm për letërsinë malaziase, por edhe atë shqiptare, Zuvdi Hoxhiqi-Berisha është laureat i çmimit kryesor për letërsi në Mal të Zi.

Ai mori çmimin “Mirosllavlevo jevangjele” për vitin 2016, për romanin “Të gjithë të mijtë”, një roman që rrëfen udhëtimin dramatik të familjes së tij nga Kodralia e Deçanit e deri në ditët tona, duke ndërthurur protagonistët realë me imagjinatën e pasur krijuese të autorit, me stilin e tij të veçantë, që lexuesi shqiptar i mban në mend nga “Viti i Gucisë”, “Dimri” e “Ylli i Davidit”.

“Gjysh e kam Cuf Berishën, bektashi, i biri i dervishit Ali, nip i sheh Ramës, të birit të Rizah Kodralisë, shehut të Teqës së Vogël, të babës së dervishit emrin e të cilat ma kanë lënë mua – Zuhdi. E quajnë e Vjetër ose e Vogël, sepse është edhe njëra, edhe tjetra, më e vjetër se njëzet e tri teqe Bektashi, se dy Rufai, dy Sadi dhe një teqe Hamzevi, që sikurse dervishët e rrethonin në rrënjë në Dukagjinin kodrinor dhe fushor...” nis romani më i ri i Hoxhiq-Berishës, “Të gjithë të mijtë”, i botuar vjet në Cetinë.

Ky roman tashmë ndodhet në fazën e përkthimit në gjuhën shqipe, meqë autori shkruan në gjuhën malaziase, por e kupton dhe e flet edhe gjuhën e të parëve, shqipen.
Ai që prej vitesh jeton në Podgoricë, ndërsa shkollimin e ka kryer në vendlindje, Guci, Pejë e Prishtinë. Me Podgoricën lidhet edhe krijimtaria e tij, por përmbajtjet i ka të ndërthurura me jetën e shqiptarëve, boshnjakëve e malazezëve
Çmimi “Mirosllavleve jevangjele” është çmimi kryesor vjetor për letërsi në Mal të Zi dhe ai do t’i dorëzohet Hoxhiq-Berishës nga fundi i shkurtit, në Bjello Pole.