“Andërr” me imazhet e trashëgimisë së harruar

10 Shkurt 2017 - 10:58      

Prishtinë, 10 shkurt - Kompozicione, loja me nuanca që në shumë raste sjellin imazhe të turbullta, rikthejnë copëza nga e kaluara. Vjen si një thirrje për trashëgiminë, traditën a për diçka që nuk është më, shkruan sot Koha Ditore.

Si me qëllimin për të rikthyer kujtimet e një vendi që koha dhe rrethanat e kanë ndryshuar, ekspozita titullohet “Andërr". Kjo ëndërr e artistit Zymer Mulliqi e shkrirë në pëlhurë shpaloset nëpërmjet pikturave që shtrihen në shtatë cikle: “Dremitje”, “Fushat që flasin”, “Idilë fshati”, “Legjenda e kullave”, “Qielli pa formë”, “Shpirtërat shtegëtar” dhe “Shushërima e erërave”. Vetë titujt zbërthejnë fokusin e artistit që lidhet me fshatin, e në veçanti me Bjeshkët e Nemuna.

Për ekspozitën e hapur të enjten mbrëma në galerinë “Qafa” të Ministrisë së Kulturës u shpalosën vepra të përzgjedhura nga opusi i gjerë i këtij artisti ekspresiv e tradicional.
“Një ditar rrëfimi për të kaluarën e popullit shqiptar”, e ka cilësuar, ndër të tjera, ekspozitën kuratori i saj Genc Rezniqi. Në ceremoninë e hapjes Rezniqi ka thënë se gjithsecili mund ta gjejë një “copë të vetes në punimet e Zymerit, megjithëse paraqitet një e kaluar e jona”.

Andërr” është ekspozita e parë për vitin 2017 e Galerisë së Ministrisë së Kulturës dhe do të jetë e hapur një muaj (gjerësisht, sot në “Kohën Ditore”)

Tash gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.