Rrahman Paçarizi rizgjidhet drejtor i Seminarit Ndërkombëtar për Gjuhën, Letërsinë dhe Kulturën Shqiptare

2 Shkurt 2017 - 12:12      

Këshilli i Fakultetit të Filologjisë sot ka zgjedhur drejtorin e Seminarit Ndërkombëtar për Gjuhën, Letërsinë dhe Kulturën Shqiptare, duke ia besuar edhe një mandat dyvjeçar drejtorit aktual, Rrahman Paçarizit, përcjell KultPlus. Këshilli, gjithashtu, ka zgjedhur edhe Këshillin Drejtues të Seminarit, njofton Drejtoria e seminarit.

Anëtarë të Këshillit janë: Rrahman Paçarizi, Bardh Rugova, Nysret Krasniqi, Qibrije Demiri-Frangu, Lindita Tahiri, Albulena Blakaj dhe Abdullah Rexhepi.

Në mbledhjen e tij të parë, Këshilli do të zgjedhë sekretarin shkencor dhe dy sekretarë profesionalë.

SNGJLKSH është themeluar në vitin 1974 dhe deri tash ka mbajtur 35 edicione. Në kuadër të Seminarit mbahen sesione shkencore nga fusha e gjuhësisë, e letërsisë dhe e kulturës. Gjithashtu, mbahen kurse te gjuhës shqipe për të huajt, ligjërata, referime shkencore, promovime dhe aktivitete të tjera.

Nga vitet '90 Seminari bashkorganizohet nga Fakulteti i Filologjisë i Universitetit të Prishtinës dhe Fakulteti i Histori-Filologjisë i Universitetit të Tiranës.