Tre pianistë përfaqësojnë Kosovën në Beograd

31 Janar 2017 - 10:40      

Prishtinë, 31 janar - Se arti mund ta bëjë atë që politika s’e bën dëshmohet edhe me përfaqësimin në një garë midis muzikantëve të rinj.

Jo shumë ditë pas tensioneve që shkaktoi një tren me motive nacionaliste serbe – me mbishkrimin në disa gjuhë “Kosova është Serbi” – tre muzikantë të rinj kosovarë kanë udhëtuar drejt Beogradit për të dëshmuar që kultura kapërcen barrierat politike, shkruan sot “Koha Ditore”.

Dren Hima, Enida Kavaja e Bimi Milla përfaqësojnë Kosovën në garën ndërkombëtare muzikore “Davorin Jenko” në Beograd. Hima dhe Kavaja - të dy nxënës të shkollës së muzikës “Prenk Jakova” në Prishtinë, kanë interpretuar në kuadër të kategorisë “B” që përfshin moshat 13-14 vjeç nën udhëheqjen e mësimdhënëses së tyre Vlora Baruti.

E Milla, student në Fakultetin e Arteve në Prishtinë, ka qenë pjesë e kategorisë “D” që përfshin grupmoshat më të rritura të garës. Të tre janë pjesë e garës në kategorinë e pianos. Përveç në piano, në këtë konkurs ndërkombëtar që sivjet shënon edicionin e 14-të, ka kategori edhe në instrumente frymore.

Në katër kategori të ndara sipas moshës kanë marrë pjesë 177 garues, dhe kjo ka qenë hera e parë që Kosova është ftuar si shtet në këtë garë muzikore. Mes pjesëmarrësve ka pasur pianistë të rinj nga të gjitha vendet e ish-Jugosllavisë, sikurse edhe nga Austria, Rusia, Gjermania e Kanadaja... (më gjerësisht lexoni sot në “Koha Ditore”)

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.