Kosova mes dy luftërave botërore 1918-1939

28 Janar 2017 - 15:05      

Lidhur me tërheqjen në fund të vitit 1915 të forcave serbo-malazeze nëpërmjet Kosovës, Malit të Zi dhe Shqipërisë për në Greqi, për shkak të sulmeve nga forcat austro-hungareze, gjermane e bullgare, tekstet e Kosovës thonë vetëm se forcat serbe “...gjatë tërheqjes nëpër trojet shqiptare, pos plaçkitjeve, kryen edhe krime të rënda në popullsinë shqiptare”, ndërkaq tekstet e Shqipërisë nuk merren fare me këtë tërheqje.

Tekstet e Kosovës e të Shqipërisë nuk i përmendin askund qëndrimet armiqësore të shqiptarëve dhe vrasjet e ushtarëve dhe të civilëve serbë, që në fund të vitit 1915 po largoheshin nga Kosova nëpërmjet vargmaleve të Shqipërisë, shkruan Shkëlzen Gashi në pjesën e shtatë të serisë “Tekstet mësimore të historisë së Kosovës, Shqipërisë, Serbisë, Malit të Zi dhe Maqedonisë” botuar sot në Koha Ditore.

Tekstet e Maqedonisë e përmendin përciptazi këtë tërheqje dhe gjendjen e popullsisë civile në vendet e okupuara, në Serbi dhe Mal të Zi, nga ushtritë gjermane, austro-hungareze dhe bullgare, të cilën e përshkruajnë si shumë të rëndë. Në anën tjetër, tekstet e Serbisë dhe të Malit të Zi përqendrohen më shumë te kjo tërheqje, duke i vënë në pah vështirësitë dhe humbjet e shumta të ushtarëve e të civilëve serbë që po kalonin Bjeshkëve të Nemuna, duke e quajtur “golgota shqiptare”. (Më gjerësisht mund të lexoni sot në Koha Ditore).

© KOHA. Të gjitha të drejtat janë të rezervuara.