ASHAK shënon sot 100 vjet të jetës së akademik Idriz Ajetit

27 Janar 2017 - 08:38      

Akademia e Shkencave dhe e Arteve e Kosovës shënon sot, me një konferencë shkencore, 100-vjetorin e lindjes së akademik, Idriz Ajetit.

Ky përvjetor i tij, të cilin rrallë njerëz e jetojnë, do të mbledh sot rreth 30 albanologë, studiues të shqipes e të veprës së akademik Idriz Ajetit nga të gjitha hapësirat shqiptare – Kosova, Shqipëria, Mali i Zi, Serbia si dhe nga shtete të tjera të Europës dhe bota.
Akademik Idriz Ajeti i takon brezit të albanologëve të cilët gjuhësinë shqiptare e vendosën në themele të palëkundura dhe e kthyen në faktor bashkues e integrues të kombit.

Askujt si këtij në këtë pjesë ku shtrihet kombi shqiptar nuk i ka hije ta mbajë epitetin babë i gjuhësisë.
Që nga paslufta e Dytë Botërore, fillimisht në Beograd e pastaj në Prishtinë, ai nxori qindra gjuhëtarë e profesorë që u bënë shtylla të ruajtjes e të përparimit të gjuhës shqipe.

Është rilindas i gjallë i kombit tonë, i cili mori pjesë në të gjitha zhvillimet e gjuhësisë shqiptare të gjysmës së dytë të shekullit njëzetë.
Konferenca, pjesa e parë e të cilës do të ketë karakter ceremonial, mbahet në ambientet e ASHAK dhe fillon në orën dhjetë.