Planet e Qeverisë në kulturë me projekte të dështuara ndër vite

26 Janar 2017 - 08:43      

Prishtinë, 26 janar - Ministria e Kulturës nuk e ka pasur shumë vështirë që ta përgatisë planin e punës për këtë vit. Disa prej projekteve të parapara për vitin e kaluar i ka bartur me “copy-paste” në Planin e punës për vitin 2017, shkruan sot Koha Ditore.

Kësisoj ka ngjarë me projektet kapitale në fushën e kulturës, disa planifikime sa i përket legjislacionit, financimin e institucioneve të kulturës e deri te Lista e trashëgimisë kulturore nën mbrojte të përkohshme.

Sipas Planit vjetor të punës së Qeverisë, Ministria e Kulturës planifikon që edhe këtë vit të mbështesë institucionet publike të kulturës, gjë që e bën çdo vit. Mbështetja e institucioneve kulturore nënkupton që atyre t’u përcaktohet buxheti në fillim të vitit. Sa u përket projekteve kapitale në kulturë, janë ato që përsëriten tash e disa vjet: studimi i fizibilitetit dhe projekti ideor për Teatrin e Operës dhe Baletit, rinovimi i bibliotekës kombëtare “Pjetër Bogdani” e Muzeu i Artit Bashkëkohor.

Përderisa për të parin është bërë një hap i vogël vitin e kaluar - kur në dhjetor është hapur konkursi për detyrën projektuese - dy projektet e tjera kanë mbetur në letër. Ministria e Kulturës vitin e kaluar kishte paraparë që të përfundojë punën me Strategjinë për kulturë. Madje në Planin e punës e kishte që kjo Strategji edhe të hynte në fuqi në vitin që shkoi.

Njëjtë ishte planifikuar edhe për koncept-dokumentin për promovimin e kulturës dhe atë për veprimtarinë botuese dhe librin. Krejt këto janë paraparë për sivjet pasi MKRS-ja nuk ka mundur t’i kryente punët që i kishte radhitur si prioritet vitin e kaluar (Gjerësisht, sot në “Kohën Ditore”).

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.