Shteti, 13 vjet pa zgjidhje për gjësendet e viktimave të luftës

15 Dhjetor 2016 - 11:11      

Prishtinë, 15 dhjetor - Të cilësuara si dëshmi unike të luftës në Kosovë, tash e 13 vite nuk është bërë një zgjidhje për rrobat e gjësendet e të vrarëve. Ato rrezikojnë të shkatërrohen krejtësisht, duke pamundësuar kështu shndërrimin e disa prej tyre në eksponate, ashtu siç ishte planifikuar e premtuar.

Vazhdojnë të mbeten në oborrin e Institutit të Mjekësisë Ligjore në Prishtinë, ku kanë zënë vend që prej vitit 2003. Janë në një tendë ku raftet janë improvizuar me dërrasa e në kontejnerë, larg kushteve adekuate. Kur familjarët e të vrarëve vendosën që këto fakte t’i lënë në duar të institucioneve për ekspozim, ishte menduar se shumë shpejt do të ofrohet një zgjidhje për to.

Së fundmi, Instituti i Mjekësisë Ligjore ka nënshkruar memorandum bashkëpunimi me Muzeun e Kosovës. Marrëveshja midis dy palëve parasheh qasjen në resurse e informacion dhe shkëmbimin e ekspertizës, por nuk është përmendur çështja e gjetjes së një vendstrehimi qoftë edhe të përkohshëm për gjësendet që dëshmojnë mbi dhunën që u ushtrua ndaj shqiptarëve 17 vite më parë.

Muzeu i Kosovës, në kohën kur udhëhiqej nga Arbër Hadri, kishte lidhur marrëveshje për pastrim, konservim e ekspozim të këtyre rrobave e gjësendeve. Por sot e asaj dite, ato nuk janë jetësuar, derisa rreth një mijë gjësendet të sistemuara në pako letre vazhdojnë t’u ekspozohen kushteve të vështira klimatike (gjerësisht, sot në “Kohën Ditore”). 

© KOHA. Të gjitha të drejtat janë të rezervuara.