Ura e Kamares mbi Shkumbin, që lidhet me Egnatian e vjetër, monument kulture

2 Dhjetor 2016 - 13:24      

Tiranë, 2 dhjetor – Ka një urë të vjetër mbi lumin Shkumbin, që quhet Ura e Kamares, qe është një nga urat e gurit më interesante dhe më të ruajtura në luginën e këtij lumi.

Ajo ka marrë këtë emërtim për shkak të një kamareje që ndodhet në anën e djathtë të saj.

Në vendin ku është ngritur ura, shtrati i lumit është mjaft i gjerë.

Në bregun e majtë ura mbështetet në formacion shkëmbor të malit të Polisit, ndërsa mbështetja e djathtë është mbi zhavorrishten e shtratit të lumit.
Në kohën e ndërtimit të saj, ajo lidhte rrugën mesjetare të karvanëve që vinte nga Elbasani e që prej urës së Haxhi Beqarit kalonte majtas lumit, duke ndjekur trasenë e rrugës antike Egnatia, për të vazhduar në Korçë e më tej në Maqedoni, Greqi deri në Stamboll.

Gjithashtu, tek ura e Kamarës shkëputej dega rrugore që lidhte Elbasanin me krahinën e Dibrës nëpërmjet Klenjës e Zerqanit.

Kjo urë u ndërtua në 1715 nga Ahmeti nga Elbasani, sipas mbishkrimit turqisht në pllakën e gurit të Kamarës, e cila sot ruhet në muzeun e Librazhdit.