Harmonia e dy koreve me vepra për Shën Terezën

2 Dhjetor 2016 - 11:03      

Prishtinë, 2 dhjetor - Katërmbëdhjetë këngë korale pionierësh, vepra të kompozitorëve kosovarë, u kënduan në një mbrëmje të vetme, shkruan sot Koha Ditore.

Koret e shkollave të ulëta të muzikës “Prenk Jakova” nga Prishtina dhe “Çesk Zadeja” nga Ferizaj përmbyllën natën e katërt të festivalit “Ditët e Muzikës Kosovare 2016”, i cili këtë vit i kushtohet Shën Terezës. Të gjitha veprat në repertor që u kënduan të enjten në kishën “Shën Ndou” ishin vepra të cilat janë shkruar e kompozuar pikërisht për Nënë Terezën në vitin 1990, në 80-vjetorin e lindjes së saj, pos njërës që është kompozuar më 2015. U bënë bashkë në një repertor në vitin ku ajo u shenjtërua nga Papa Françesku më 4 shtator të këtij viti.

Të parët në skenë u ngjitën pjesëtarët e korit të shkollës “Prenk Jakova”, me këngët e Lorenc Antonit, Musa Piperkut, Pranvera Badivukut, Veronika Mjedës, Selim Ballatës, Sevime Gjinalit dhe Gjon Gjevelekajt. Nën drejtimin e dirigjentes Adelinë Ndreca-Kolaj sollën shtatë këngë.

Të enjten ka ardhur me zërat e 30 vajzave që interpretuan veprat e Mendi Menxhiqit, Vinçenc Gjinit, Musa Piperkut, Lorenc Antonit, Ramadan Ramadanit, Rauf Dhomit dhe Zeqirja Ballatës. Vetë Ballata, kryetar i Shoqatës së Kompozitorëve të Kosovës, që organizon “Ditët e Muzikës Kosovare”, ka thëne se futjen në program të këtyre dy koreve ai e ka konsideruar si të natyrshme dhe të nevojshme pikërisht për faktin se veprat janë të kompozuara për kor të pionierëve dhe fëmijëve.

Pjesëmarrjen në këtë festival dirigjentet e kanë konsideruar si një mundësi e mirë për shpalosjen e punës që ato bëjnë me koret (gjerësisht, sot në “Kohën Ditore”).

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.