Ministria do të investojë afër 340 mijë euro për Qendrën Kulturore Boshnjake

19 Nëntor 2016 - 11:27      

Kryetari i Komunës së Prizrenit, Ramadan Muja, dhe sekretari i përhershëm i Ministrisë së Kulturës Rinisë dhe Sporteve, Veton Firzi, kanë nënshkruar një memorandum bashkëpunimi për mbështetjen financiare të ndërtimit të Qendrës Kulturore Boshnjake në Prizren.

Sipas dokumentit të nënshkruar ujdia do të zbatohet gjatë vitit 2017, me ç’rast MKRS-ja ka marrë përsipër investimin e 337 mijë eurove në këtë projekt kapital.

“Bazuar në kontratën e lidhur nga Kuvendi Komunal i Prizrenit me kontraktorin në vlerë prej 387 mijë eurove, MKRS-ja investon 337 mijë euro, që do të bëhet në dy faza. Faza e parë e investimit do të jetë 168 mijë e 500 euro në gjashtëmujorin e parë të vitit 2017. Faza e dytë e investimit do të jetë 168 mijë e 500 euro në gjashtë mujorin e dytë të vitit 2017”, thuhet në memorandumin e nënshkruar nga Muja dhe Firzi.

Aty shkruan se Komuna e Prizrenit, bazuar në kontratën e lidhur me kontraktorin në vlerë prej 387 mijë eurove, ka investuar 50 mijë euro, dhe se merr përgjegjësinë mbi të drejtën pronësore-juridike në parcelën në të cilën ka filluar ndërtimi i Qendrës Kulturore Boshnjake, në vitin 2015. (Artikullin e plotë mund ta lexoni në numrin e sotëm të Kohës Ditore)

© KOHA. Të gjitha të drejtat janë të rezervuara.