Ribotohen 11 vëllime të “Albanisë” së Konicës

15 Nëntor 2016 - 15:45      

Biblioteka Kombëtare dhe Arkivi Qendror i Shqipërisë, mbështetur nga Ministria e Kulturës dhe Ministria e Punëve të Jashtme kanë hapur ekspozitën “Identiteti kombëtar dhe diasporat”, në kuadër të Samitit të Diasporës.

Kjo ekspozitë skicon një retrospektivë të historisë dhe jetës së diasporave shqiptare duke theksuar të përbashkëtën e tyre të madhe: ruajtjen dhe zhvillimin e identitetit kombëtar.

E konceptuar në dy plane ekspozita paraqet dëshmi librore historike, botime etnologjike, religjioze, muzikore, letrare e kulturore; si edhe gazeta e revista të Kolonive. Këto njësi vijnë nga Fondi i BKSH-së dhe përzgjidhen e përgatiten për ekspozim nga grupi i punës i BKSH-së. Ndërsa paraqet në riprodhime “forex” dokumente të statuteve të shoqërive patriotike e letrare, aspekte të aktivitetit të shumtë politik e diplomatik të tyre, portrete, imazhe dhe pjesë të tjera dokumentuese. Kjo pjesë vjen nga Fondi i AQSH-së, përzgjidhet e përgatitet për ekspozim nga grupi i punës i AQSH.

“Falë bashkëpunimit shembullor mes dy ministrive, bëhet e mundur të realizohet amaneti i Konicës (premtuar publikisht edhe më 6 tetor nga dy ministrat gjatë ceremonisë së dorëzimit të Shtampës së BFK). Paraqiten në një ekspozitor disa prej librave më të rëndësishëm përfshirë dhe një antikuar të Leonik Tomeut, i vitit 1532 (tjetër pinjoll diaspore arbërore). Botimi Anastatik i koleksionit të plotë të revistës “Albania” të Konicës, botuar nga “Kult”. Ky është një botim luksoz i Albanisë, identik me origjinalin. Janë rreth 11 vëllime”, thuhet në njoftimin e Ministrisë së Kulturës në Shqipëri, të cilët kanë njoftuar se kjo ngjarje do të mbahet më 17 nëntor në Bibliotekën Kombëtare në Tiranë, me fillim në ora 18:00.