BE-ja kritikon mosndëshkimin e shkatërruesve të trashëgimisë kulturore

11 Nëntor 2016 - 10:01      

Prishtinë, 11 nëntor - Shkatërrimi i trashëgimisë kulturore, mosndëshkimi i atyre që kanë pasur dorë në këtë gjë, degradimi Qendrës Historike të Prizrenit, përmirësimi i bashkëpunimit të Qeverisë me Kishën ortodokse serbe dhe plotësimi i Ligjit për trashëgimi kulturore, janë vërejtjet kryesore që paraqiten në Raportin e Progresit për Kosovën, shkruan sot Koha Ditore.

Raporti, i miratuar nga Këshilli i Evropës të mërkurën e kësaj jave, adreson një sërë problemesh në fushën e trashëgimisë kulturore dhe jep rekomandime sesi duhet të veprohet në të ardhmen.
Sa i përket kësaj fushe, ministri i Kulturës, Rinisë e Sportit, Kujtim Shala, ka thënë se është duke u bërë progres. E nga ana tjetër, për shoqërinë civile, raporti e pasqyron saktë gjendjen në trashëgiminë kulturore në vend.

“Incidentet e shkatërrimit ilegal të trashëgimisë kulturore kanë vazhduar dhe sanksionet kundër kryerësve nuk janë zbatuar”, shkruhet në Raport.

“Përmirësimi i komunikimit me klerikët rezidentë në Kishën ortodokse serbe mbetet një sfidë. Autoritetet e Kosovës kanë filluar që të adoptojnë legjislacionin për të përfshirë të gjitha dispozitat thelbësore të Aneksit 5 të Pakos së Ahtisarit, sa i përket menaxhimit dhe mbrojtjes se trashëgimisë fetare e kulturore serbe në Kosovë”, shkruhet në Raport (gjerësisht, sot në “Kohën Ditore”).

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.